Daip

Vattig joar leden lagen in de veenkolonies honderden kilometers knoalen.
Apmoal mit schoppe groaven.

Toun t vervoer per schip laangzoamerhaand vervangen wuir deur vrachtwoagens gruide de boudel dicht en men besloot de daipen en de wieken te dempen.

Veurdat zover was mieterde elkenain zien olle rommel der nog even in.

De restanten van de prille welvoartstoat, bouwafval, verroeste fietsen, wasmachienen etc.

Henderk Gossel haar aan t énde van de oorlog n Duutse soldaot aan t mes regen dei der mit zien Gazelle vandeur wol.

Hij haar m in toene begroaven mor ik heb heurd dat e hom weer opgroaven het en in de onderwaale van t Zuuderdaip legd het.

Een dag veurdat de zandauto’s kwamen.

In vrouger tieden verzoop der nogal es aine in al dat wotter.

Doene kirrels dei t stuur nait recht holden konden mor ook, huil verdraitig, veul klaine kinder.

Ain doarvan heb ik goud kénd: Gerrie.

Hij zat mie in klas en noa schooltied gong ik voak mit hom noar huus.

Zien ol luu waren schaiden en hij woonde bie zien moeke.

n Huile mooie, jonge vraauw.

Gerrie zien voar kwam óf en tou laangs en den wast feest.

t Was een laange, schiere kirrel mit n Prins Bernhard-zunnebrille en t hoar strak achterover van de brillantine.

Op n dag kwam e mit n auto aan. n Gruine Fiat 850.

n Sportief model mit dobbelstainen aan t spaigeltje en n leren hoes om t stuur.

-Wie goan n éndje rieden, sprak e en dou ze uut zicht van zien ex waren mog Gerrie achter t stuur.

Hij kreeg n kussentje onder de kont zodat e net over t stuur kon kieken.

Doar gong t hén.

Op de laange veenkoloniale wegen gong t goud mor bie de bocht in Kavelingen ist beurd. Gerrie wost t verschil tussen links en rechts nog nait zo goud en toun zie voar ruip:’remmen!”, trapde op gaspedoal en verdwenen ze in t broene wotter.

Pas n weeke loater, toun aine een poar dobbelstainen in t knoal

zag drieven, hebben ze ze vonden..

Site design: Digital Magician