Jimi
Tegenwoordig hést Spotify, Itunes en YouTube dus kinst altied alle muziek heuren deist mor bedenken kinst.
Dat was in ons tied wel aans. Een elpee kostte 21 gulden en mit vief gulden
zakgeld most wel huil laank spoaren veurdast die wat neis kopen konst.
Wie haren der wat op vonden: Wie gongen bie mekoar luustern.
Popke had Patti Smith, Bertje had Graham Parker en Jan had de eerste Van Halen en AC/DC.
Herman Brood hadden we wel apmoal.
Potje bier derbie en ploatje draaien.
In de punktied gong ik mit bus van Knoal noar Stad om de Sex Pistols en Stiff Little Fingers te kopen want dei hadden ze nait bie Steeman op Musselknoal.
Buurman van Jan heurde ons wel. Dat kon ook nait aans want wie draaiden op flink volume.
Op een dag nuigde ons binnen. T was n kirrel van dik in de zestig. Hij was nog törfsteker
wést en was nou mit pensioen.
Hij gong zitten, pakte een elpee van de stoapel, legde m op t pickuppie en luit de noald
zakken.
‘Dit is de mooiste meziek dei ooit moakt is’, sprak e. Wie verwachtten n nummertje van De
Zangeres of t Sneeuwbaltrio. Mor niks: Jimi Hendrix!
Hij draaide de verstaarker nog wat verder open en dou Hendrix bie de solo van Red House
aankommen was biggelde der n dikke troan over zien wangen.