Aan t énde van Ons Dörp ston n ol café.

Mien pa en moe haren de bruuloft der nog vierd en ain keer per joar kwam t Rode Kruus der n film vertonen.
Altied dezulfde. Laurel en Hardy mit dei piano en ’s oavends Rio Bravo mit John Wayne veur de volwassenen.

 

t Luip al n tiedje nait zo goud meer mor nou was der n neie eigenoar.
n Jonge vent. t Was n neef van Harry Muskee en dat is in Drenthe sikkom ofdast van Keuninkleke ófkomst bist.

 

Hij haar groode plannen. In t achterzoaltje kwam live-meziek. Elke weeke n band.
En nait de eerste de beste: Cuby, Herman Brood, Livin’Blues, the Troggs (Wild Thing!) en de Police.

Over dei léste vertel k n aander moal.

 

Ik was vattien en mog nog nait noar t café mor moeke had bedocht dat ik recht had op n

beetje cultuur en dit waren concerten dus…as ik mor om elf uur thuus was.

 

Ik kreeg al vlöt n potje bier veur de neuze woar ik huil dankboar veur was want ik haar mor drei gulden in de buutse.

Loater bleek dat dat onderdeil wést was van n rondje en dat ik nou aan de beurt was.

 k Wait nait meer hou k mie doar uutluld heb.

 

Ik gong aan n toafeltje zitten mit n groode gloazen askebak derop. Der zaten n paor hippies n dikke joint te draaien. Of ik ook n trekkie wol?
Ik haar al muite mit mien daarde pilsie dus doar heb k mor veur bedaankt.

 

t Was n mooi zootje bie mekoar. De vaste jonges, de stroatleggers, bikers, hippies en aander ongeregeld volk vanuut de huile veenkolonies.

Ik vuilde mie der wel thuus. Vanóf dat moment wol ik mor ain ding: popmuzekant worden.

 

Joaren loater speulde ik op n festival dat organiseerd was deur De Neef Van Harry Muskee.
Bie t ófreken begon ik over dei kroeg en bedaankte hom veur dei geweldige oavends.

Hij dee n stappie achteruut en zee: ‘Twaide Mond? Proat mie der nait van! Eerst sluigen ze mie mit n dikke gloazen askebak veur de harsens en n weeke loater zetten ze mie n pistool tegen de kop.

Wat’n klotendörp!’