As ik gain draank op heb ben ik n nogal nuchter persoon. Ik leuf niks wat ik nait mit aigen ogen zain heb.
Toch is mie hier wat overkommen dat mie aan t denken zet.

Zun eerste nacht in n vrumd gebaauw is altied wat apaart. Waist de weg nog nait goud, heurst geluuden deist nait thuus brengen kinst en ik wil nait zeggen dat ik baange was mor huilmoal rielekst lag ik der nait bie op mien matrassie.

 

Ik haar mie n mooi plekkie tussen wat boukenkaasten uutzöcht zodat de minsken van boeten mie nait liggen zagen.
Der fladderden wat insecten deur t lokoal, óf en tou kwam der n auto veurbie mor verder was t, op de piep in mien oren noa doodstil.

Ik bin n slechte sloaper mor noa wat hin en weer gedraai vuil ik toch vlöt in sloap.

 

Midden in de nacht schrok ik inains wakker van geluud. Vanonder de deken keek ik veurzichtig de ruumte in.
En nou komt t: doar luip n vraauw! N wat older minsk met n gries permanentje en een schoet aan en n kopstubber in de haand.
Ze luip laangs mie hén, draoide heur heufd noar mie tou en laachde vrundelijk. Ze zee niks mor ik begreep dat de boodschap was: ‘Tis ok dast hier bist, mienjong. Bist goud bezig”. Noa n seconde of tiene was ze weer verswonnen. Ik vuilde mie geliek volkomen op mien gemak en loop nou midden in de nacht deur t gebaauw asof ik hier al joaren woon.

Ik nuim mien ‘spook’ vraauw Schreuder en wie hebben t hier huil goud mit zien baiden..

schoet=schort

kopstubber=ragebol