Of ik wel n poar laidjes zingen wol bie de presentoatie van Herman Sandman’s neie bouk ‘De Laange Leegte’?

 

Dat wol ik wel. ‘Woar ist?’  ‘In Amsterdam’, wast antwoord. ‘In Bos en Lommer’.

Herman zag bie dei noam n mooie boetenwiek á la Wassenoar veur zug.

Ik wos wel beter. Ik haar doar tien joar leden n zètje op koamers woont en der woonden nait veul minsken dei Nederlands spraken. Loat stoan lazen. Dus wèl doar n boukenwinkel begon haar alle steun neudig dei ze kriegen konden.

 

Ik zol ophoald worden deur de uutgever en n aander Grunneger auteur: Bill Mensema.

Ik docht, dei uutgever komt veurrieden in zien neie BMW en ik vlei mie mooi op de achterbaanke neer.

Niks heur: der kwam n klain Japans koekblikkie veurrieden mit Bill achter t stuur en de uutgever dernoast.

Ik mog mie achterin opvaauwen.

 

Dat wast aargste nait mor Bill ree zoals Theo van Gogh columns schreef: volop gebruuk moakend van zien recht op vrije meningsuuting.

Links en rechts knapden we de aandere weggebruukers veurbie terwiel Bill mit zien voeste schudde en luudkeels òfgaf op de riekwaliteiten van de luu dei wie passeerden.

 

Noa n dodenrit kwamen we aan in Mokum. Tussen de bèlwinkels en de Shoarmazoaken zat inderdoad n boukwinkel. En nog n leuke ook!

Der was rekent op n man of vieftig mor de hèlfte was thuusbleven.  De rest was familie van Herman, zien kinder, zien schoonzussen (stuk of zèsse), Appie Alberts, onze favoriete politicus Jaap Dijkstra en zien vraauw en twei vriendinnen van mie uut Amsterdam.

Bill en Herman lazen veur. de directeur van t Rijksmuseum (uut Veendam) kreegt t eerste exemploar en ik zong n poar laidjes.

Toun t bier en de chips opwaren gong elkenaine weer op huus aan.

Ik zol weer achterin dus toun de prachtige actrice Lotte D. mie vruig of ik bie heur bleef sloapen huifde ik nait laank noa  te denken…

 

 

Nou nog even over de Laange Leegte. Ik heb m uut en dit is zunder meer t beste bouk dat Herman schreven het. Ik was al fan mor nou kin e huilmoal nait meer stuk. Verkrijgbaar in de betere boekhandel (zulfs in Bos en Lommer…)