Zugst t wel voaker de leste tied: Bandjes dei weer bie mekoar kommen.

Der wordt wat of reuniëerd in muziekmoakend Nederland.

Zo was ik lest bie t eerste optreden in draientwintig joar van de Oostgrunneger rockers ’the Big Bones’.

Ze waren der apmoal. Behaalve bassist Gerald die oet tied kommen was.

k Vond het altied al een dooie’, zee Gea, de vraauw van zanger Eltjo. Gea was vrouger de keunigin van t Maarktplain in Sodom. Alle kirrels wollen wel n moal mit Gea brommers kieken en de maisten deden den ook.

En den zeggen ze nog dat vraauwluu nait in techniek interesseerd binnen. Enfin, veurdat ik heur mien Zundapp zain loaten kon, was ze al aan Eltjo blieven hangen. Eltjo ree in t bussie van de band en dat was wel zo waarm aan de kont bie winterdag, zee Gea. Nait veul loater was der ain lutje Eltjo en mozzen wie malkánder de brommers loaten zain. Drai kinder en doezenden Marlboro lights loater was t mooiste bie Gea der wel of.

Eltjo haar k hoast nait herkend. Zien mooie Winschoter Rock Kapsel was verswonnen en en wat e nog aan hoar had zat verstopt onder ain John Deere petje. Drummer Gozzel was al doen dou feest nog begunnen mos dus dei was nait slim veraanderd. Lutje Eltjo speulde bas. Ain nuver jonkje met ain blond pruukie hoar woar e wel ain haile pot gel in smeerd haar. Achter t orgel zat Kees Groting, dai der indertied allenig moar bie was omdat zien voar ain elektronicazoak op Knoal haar.

Was wel handig veur de snoertjederij, vonden de jongens. Kees haar winkel overnomen en was nou de trotse eigenoar van ain haile keten witgoudzoaken. Zagst hom sikkom elke week op TVNoord met zien aigenwieze kop uut ain wasmachine steken: Witgoed van Groting past op iedere begroting. Most der mor opkommen.

De band begon mit ‘Born to be wild’ en dou ze bie ‘Proud Mary’ aankommen waren en Gea t podium beklom om de partij van Tina Turner te zingen bin k moar noar huus tou goan. The times they are changing.. *Winschoten