Ain van de Nozems vertelde mie lèst het volgende verhoal over zien grootvoader: sloager Bos uut Emmercompas. Het speult zug òf in de joaren dattig van veurige eeuw en wordt bevestigd in t boukie ‘Hopend op een vrijer leven’ van Sietse van der Hoek.

 

In dei tied luip der in dei contreien n zekere Tabak rond. Elkenain was benaauwd veur hom. Veural de vraauwluu en doar muik e nogal es misbruuk van.

Körtom, n minne kirrel.

Tabak speide der nait in en op zekere dag bezöchte hij n café in Emmen.

Doar zat Jan de Jong op zien neie mondörgel te speulen.

Der wuir wat daanst en elk haar plezaaier totdat Tabak Jan zien mondharmonica òfpakte. De Jong bedocht zug nait, greep n keu van t biljart en sluig Tabak der mit op kop.

Tabak greep zien F.Herder en stak de Jong overhoop. Dood.

Tabak veegde zien mes of aan t biljartloaken, stak m in weer in de buutse en luip noar boeten. Veurdat minsken weer van schrik bekommen waren gong de deure weer open. Tabak kwam binnen, greep zien pette van toafel en verdween weer in de nacht.

 

Tabak wuir veroordeeld mor kwam noa n poar joar weer vrij vanwege goud gedrag.

 

Sloager Bos haar n nuvere dochter en doar haar Tabak zien zinnen op zet.

Bos wol der niks van waiten en ze kregen roezie.

Sloager snee Tabak de hals òf mit zien groode uutbainmes, stopte hom mit de kop in t askegat totdat e stikt was en schoof hom zo t knoal in.

 

Volgende dag kwam pliesie informeren of Bos ook wos woar Tabak bleven was.

‘Doar’, zee Bos en wees noar’t knoal.

Pliesie het hom deruut vist en Bos het der nooit weer wat van heurd.

 

Klainzeun van Sloager Bos zit dus in de Nozems en ik mout zeggen dat bovenstoand verhoal de verholdingen in de band wel wat veraandert hebben. Dus ast die òfvroagst woarom der zoveul accordeon op de neie elpee stoat den waist nou hou dat komt..

 Over een eigentijdse Tabak schreef ik ‘Elvis, Keuning van de Bunermond’