Oh, was ik mor n Neger

Veenkolonioalen binnen immigranten. Van oorsprong kommen we apmoal aargens aans vot:
Franse soldoaten van Napoleon dei hier hangen bleven, Duutse deserteurs uut de Frans-Duutse oorlog, Zwitsers, Fraizen en noa de Twaide Wereldoorlog nog wat Poolse bevrijders. Wel waren t, op n enkele Ambonees noa apmoal blaanken.
Toun ik tien joar was had ik nog nooit n gekleurd persoon zain.

Totdat op n deurdeweekse dag aargens in de joaren zeuventig n neger veur de schoule ston. Mit n bolhoud op en n wandelstok in de haand.
‘Nait wiezen!’, ruip meester nog mor der was gain holden meer aan.
Binnen de körtste keren stonden der tachtig kinder mit de neuzen tegen t glas aanplakt.
Dat was mie wat! n Echte Neger,en ook nog verklaid as Charlie Chaplin!
Loater ontdekte ik dat de maiste meziek dei ik mooi von deur zwaarte Amerikoanen muikt wuir.
Ook von ik dat ze der fantastisch uutzagen. Zet Marco Borsato noast Bootsy Collins en begriepst wel wat k bedoul.

 

Dou ik in Stad gong wonen kwam ik in aanroaking met Surinoamse muzekanten. Ook al van dat mooie volk. Ze konden apmoal geweldig speulen, druigen knalgele pakken zunder dat t der belachelijk uutzag en ze hadden soms wel vief wichter tougelieks an touw.
Aigenlieks wol ik ook wel groag n neger wezen.
Nou kinst diezulf wel opnei uutvinden mor an dien huudskleur valt niks meer te veraanderen. Michael Jackson is n énde kommen mor loaten we wel wezen: dat zag der nait gezond uut.

 

Ik haar bedacht dat ik in elk geval dat relaxte loopie van ze overnemen kon.
Op mien menaaier swingde ik derover.
Totdat n klain jonkie in d Oosterpoort mie noaruip: ‘Meneer, meneer! Waarom loopt u zo raar?’

Kloar wast. Ik bin n boer en ik blief der aine….

 

Marco

Bootsy

Site design: Digital Magician