‘Volgende weeke weerkommen, jongens’,  zee de krougboas noa t zoveulste optreden van Livin’ Blues.
‘Den hewwe wat neis: Punkmeziek!’
Doar haren we wel es wat over lezen in Emmer Kraante: Luu in Engeland mit gruin hoar en veiligheidspelden deur de wangen.

 

Op t affiche stonden Cherry Vanilla, Wayne County en heur begelaidingsbandje The Police.
Cherry kwam nait opdaogen. Dei zol wel docht hebben: ‘Twaide Mond? WTF!’

 

Police dee eerst n poar nummertjes van zukzulf.  ‘Dat wordt nooit wat’, zeden wie tegen mekoar.

 

Noa de pauze kwam Wayne County, n travestiet uut New York. Bekend in kringen van Andy Warhol en Lou Reed.
Heur ‘hit’ was “If you don’t wanna fuck me, fuck off”.
Wayne was haard opweg om Jane te worden.
Ze haar al tietjes mor t klok en hoamerspel was ook nog aanwezig, zeg mor.

 

Stuk of vattig veenkolonioalen namen ploats veur t podium in n oafwachtende holding.
Wayne dacht de boudel wel even te shockeren mit heur act. Dat lukte ten slotte in Amerika ook oardig.
Zo nait in Twaide Mond. Wayne dee aal gekker om mor n beetje indruk te moaken mor de reacties bleven laauw.

 

Bie heur priesnummer klom der n doene boer op klompen t podium op, luit zien boksem zakken en begon tegen heur aan te rieden.
Dat leverde nog wel n auplaussie op.

 

Loater heb ze Wayne trugvonden, in troanen, op de dames-wc. 

 

 Mit daank aan Henk Wanders dei n geheugen as n olifant het..

klik hier voor aflevering 1