Summer of ’79

 

De mooiste zummer van mien leven was in t joar dat ik mien diploma hoalde.
Ik haar zun hekel aan school.
Elke dag twintig kilometer fietsen en den mor hopen dat e dei nacht ófbraand was.

 

In 1979 wast zover. Wie wazzen al in Maai vrij en ik haar n boantje kregen

bie de Enka in Emmen.
Plougendainst.

 

Dei zummer haren we intrek nomen in n groode boerderij in t Aander Dörp.
Doar woonde n kameroad van ons en zien ol luu zaten in t boetenlaand.

Apparatuur van de band wuir installeerd op koustal en wie lagen op matrassen in de woonkoamer.

t Luip al vlöt uut de haand.

Hasj, bier en LSD en gebrek aan touzicht zórgden derveur dat t binnen de körtste keren n zootje was.

 

Jappie K. knapde mit zien auto tegen boom op. Mit zeuven haalve liters achter de knopen.
t Gebeurde recht veur zien aigen huus dus hij huifde nait ver meer te lopen.
Auto was wel total löss. Hij kreeg n neie op veurwaorde dat e nooit meer bie ons langsgoan zol.

 
Op t febriek haren we elk uur tien minuten rookpauze.

Ast de machines apmoal geliek aanzetste konst wel n haalf uur blieven zitten.
Óf en tou wuir der ook nog stoakt. Wie bleven den gewoon n poar doage thuus.

 

Aant énde van de zummer mossen we de boudel ontruumen veurdat de aigenoar weer thuuskwam.
Zien zeun bleef mit de brokstukken zitten.

 

Dou boer weer thuus was zol e zug wel ófvroagd hebben: ‘Wel het al mien draank opzopen? 

‘Wel het der in mien bérre sloapen?’

En veuraal: ‘Wel het doar mien zeuventienjoarige dochter bezwangerd?’

Site design: Digital Magician