Òflopen dunderdag weer op huus aan.

Ik haar t schoultje in Eerste Exloërmond in redelijke stoat achterloaten en de auto vol mit spullen loaden.

Dou ik thuus kwam in t duuster is der bliekboar wat mis goan. Vrijdagvummerdag wuir ik uut bèrre beld deur twei politieagenten.

Hou ik der bie kwam om mien rötzooi zo mor bie de stroate te zetten? Ik zeg- ik bin net n moand vot wèst. Ik heb huilmoal niks bie stroate zet.-

-Nou, zegt d’aine tuute, -der zat aans wel mooi n braif van n deurwoarder veur die in dei deuze mit gerdienen-.
Dou gong mie n lichie braanden.
Bliekboar haar ik in duuster dei deuze over t heufd zain.

Ze belden geliek mit de voelniswoagen en inderdoad, dei gerdienen lagen der nog in. De rest was heloas al verswonnen: koabels, microfoons, stemapperoaten, mondörgels, een opnoameapperoatje mit alle neie nummers en, wat nog t aargste is: mien schriften mit de teksten van de neie nummers.

Nou heb ik heurd dat dei de originele teksten van Beatle-nummers soms wel veur n miljoen veild worden.

Ik mag hopen dat noa mien dood mien aantekenboukie ook nog boven wotter komt. Mot tegen dei tied toch wel zun viefentwintig euro opbrengen….