Bert Hadders

Na twee jaar trouwe dienst is Meziekperfester Bert Hadders ontslagen.

Blijkbaar drukte zijn gage zodanig op de begroting van Radio Noord dat het niet meer verantwoord was hem in dienst te houden.

Jammer, maar de schrijverij gaat gewoon door. Naar een nieuwe vorm wordt nog gezocht.

Hieronder de laatste column.

Vanuut studio van Radio Noord hèst uutzicht op t grootste deurwoarderskantoor van Grunnen. Zol dat n rol speult hebben bie t besloet van directeur Nomden om flink te snieden in de onkosten nou joen favoriete omroep veur t zesde joar in de rode ciefers dreigt te kommen?

Gedwongen ontsloagen binnen nait neudig lezen wie in t Dagblad van t Noorden. Wel broedt de omroep op klaine aanpassingen in t radio en tv aanbod. Woar percies in programmering wordt ingrepen kon directeur nog nait zeggen.

Inmiddels is wel duudelek dat de Meziekperfester t eerste slachtoffer van dizze bezunigingsronde is. Bliekboar drukt mien exorbitante beloning zo zwoar op begroting dat t nait meer verantwoord is mie in dainst te holden.

Dit artistieke en financiele offer brengt de Perfester vanzulf groag om Radio Noord ‘waar je Groningen hoort’ in locht te holden.

Mor wat te doun mit aal dij vrije tied? Tournee mit Herman Sandman begunt pas in janijoarie en de Aardbevingssymfonie mit t Veenkolonioal Symfonie Orkest is pas veur ènd 2024 inpland.

Twintig joar leden zat k in n soortgelieke sitiaotie.

N lege agenda en n laange lege zummer veur de boeg.

Noa laank twiefeln ston ik veur de deure van Socioale Dainst om n uutkeren aan te vroagen dou mien tillefoon gong. Mien zangleroares CT Heida belde mit de vroag of k mit wol noar Den Haag. Poffertjes bakken op de Parade. Mien boukholder Harry Blaak dee doar ook de financieen en zien vraauw Carina Visser haar der n poffertjeskroam. T gong van Den Haag noar Utrecht om te eindigen in Amsterdam.

T personeel beston uut klanten van Harry, mezekanten en kunstenoars uut Grunn dij apmoal muite haren om zummer financieel deur te kommen.

T waark was nait stoer. T concept was ‘Nait soezen, zulf bakken”. Minsken kregen veur drij euro n flessie beslag en konden den zulf aan de slag. ‘s Middags kinder en ‘s oavends doene Hagenezen.

Groatis kost en inwoning en gain uutgoaven zörgden derveur dat k mit n volle portemonnaie weer thuuskwam. Dat heb k tien zummers doan. Dat moakt mie dunkt mie de Trijnko Nieboer van de streektoalmeziek.

De grootste attractie van de Parade was noast de theaterveurstellingen de zweefmeulen. Dij wuir runt deur Grunneger Bernhard Blik. Meulen was al honderd joar óld en kroakde in zien voegen mor kon nog bèst haard. ‘s middags gong nog redelek beschoafd mor ast ainmoal duuster was vlogen de bakkies horizontoal deur de locht. Berhard greep af en tou n bakkie, t laifst aine mit n schier wicht derin, huil hom even tegen en luit den weer lös. Het gegier van de wichter dij den extra hoog en haard deur de zummernacht vlogen was oorverdovend. Onder de meulen ston de nachtburgemeester van Rötterdam, Jules Deelder onverstoorboar zien jazzploatjes te draaien. Aan t ènde van de oavend gongen de lochten uut, de rookmachine aan en gong de meulen in de viefde versnelling. De wichter gierden as zwienen in t slachthuus en de poffertjesbakkers deden de koksmutse óf op weg noar n laange draankovergoten zummernacht. T léste nummer was altied Sexy Girls van de Duutse orkestleider Gerd Wilden en doarmit wil ik den ook twij joar Meziekperfester ófsloeten.

Bedankt veur t luusteren, veur de veule suggesties, correcties en veural complimenten. Rolf Schreuder en Henk Scholte stief bedankt veur de gelegenhaid dij je mie boden hebben.

Om mit de britse zangeres Vera Lynn te spreken: “K wait nait wanneer, ik wait nait woar mor wie zain mekoar”